Pizzan heimsendir

Persónuvernd

Gildir um upplýsingar sem safnast í leiknum Pizzan heimsendir á leikur.pizzan.is.

Síðast uppfært: 29. október 2026

Pizzan heimsendir er leikur þar sem þú kemur pizzum heitum á leiðarenda. Hér kemur fram hvaða upplýsingum leikurinn safnar, til hvers þær eru notaðar og hvernig þú getur breytt þeim eða látið eyða þeim.

1.Ábyrgðaraðili

Pizzan ehf., kt. 681016-1200, er ábyrgðaraðili að vinnslu persónuupplýsinga í leiknum. KIWI ehf., kt. 681116-2300, Reykjavík, gerði leikinn, hýsir hann og vinnur með upplýsingarnar fyrir hönd Pizzunnar (vinnsluaðili). KIWI ehf. tekur við öllum fyrirspurnum og réttindabeiðnum vegna leiksins.

2.Hvaða upplýsingum er safnað

Þú getur spilað leikinn án þess að gefa upp nokkrar upplýsingar. Þegar sending kemst á leiðarenda geturðu skráð þig á stigatöfluna og þar með tekið þátt í gjafaleik Pizzunnar, sjá skilmála gjafaleiksins. Til þess þarftu að gefa upp nafn og netfang og samþykkja að Pizzan megi senda þér tölvupóst. Þá er safnað:

• Nafni sem þú velur (2 til 12 stafir). Það birtist öllum á stigatöflunni, svo þú getur notað gælunafn ef þú vilt ekki birta fullt nafn.
• Árangri í leiknum: fjölda pizza sem skiluðu sér, hita þeirra við afhendingu, stigum, fjölda zombies og tímasetningu.
• Netfangi. Það birtist hvergi á stigatöflunni.
• Samþykki fyrir tölvupósti: að þú hakaðir við „Pizzan má senda á þig tölvupóst með nýjustu tilboðum og upplýsingum“, hvenær og með hvaða texta.
• Tæknilegum upplýsingum: handahófskenndu auðkenni sem vafrinn þinn býr til fyrir leikinn, og dulrituðu fingrafari af IP-tölu tækisins. IP-talan sjálf er ekki geymd.

Auk þess er talið hve oft leikurinn er opnaður og spilaður, á hvers konar tæki (snertiskjár eða tölva) og hvaðan heimsóknin kemur, til dæmis af samfélagsmiðli eða úr auglýsingu. Þetta er geymt sem samtölur fyrir hvern dag. Fingrafar IP-tölunnar er notað til að telja hvern gest aðeins einu sinni á dag og því er eytt eftir tvo daga.

Leikurinn notar ekki vafrakökur. Nafn, netfang, stillingar og met eru vistuð í vafranum þínum (localStorage) svo þú þurfir ekki að slá þau inn aftur. Þú getur hreinsað þau með því að eyða vefsíðugögnum fyrir leikur.pizzan.is í vafranum, og fyrir static.kiwi.is ef þú spilaðir leikinn þar áður.

3.Í hvaða tilgangi og á hvaða heimild

• Stigataflan: nafn og árangur eru notuð til að birta stigatöfluna og sæti þitt á henni. Heimildin eru lögmætir hagsmunir af því að reka leikinn, sbr. f-lið 1. mgr. 6. gr. reglugerðar (ESB) 2016/679 (GDPR).
• Gjafaleikurinn: nafn og árangur eru notuð til að finna vinningshafa, og netfangið til að hafa samband við hann og afhenda vinninginn. Heimildin er að framfylgja skilmálum gjafaleiksins sem þú samþykkir við skráningu, sbr. b-lið 1. mgr. 6. gr. GDPR.
• Tilboð og upplýsingar frá Pizzunni: netfangið þitt er notað til að senda þér tilboð og upplýsingar í tölvupósti. Heimildin er samþykki þitt, sbr. 1. tölul. 1. mgr. 9. gr. laga nr. 90/2018 og a-lið 1. mgr. 6. gr. GDPR. Þú getur dregið samþykkið til baka hvenær sem er. Þá er netfanginu eytt og nafn þitt tekið af stigatöflunni.
• Tölfræði um notkun: samtölurnar eru notaðar til að sjá hvernig leikurinn gengur og hvaðan spilarar koma. Heimildin eru lögmætir hagsmunir Pizzunnar af því að meta árangur leiksins.
• Varnir gegn svindli og misnotkun: auðkennið og fingrafar IP-tölunnar eru notuð til að takmarka fjölda skráninga og stöðva falsaðan árangur. Heimildin eru lögmætir hagsmunir af því að stigataflan sé sanngjörn.

Upplýsingarnar eru ekki notaðar til sjálfvirkrar ákvarðanatöku eða prófílgreiningar sem hefur réttaráhrif fyrir þig.

4.Miðlun og vinnsla annarra

Upplýsingarnar eru ekki seldar og þeim er ekki miðlað til óviðkomandi. Þeim er einungis miðlað:

• til Pizzunnar: netföngum þeirra sem hökuðu við, svo hægt sé að senda þeim tilboð og upplýsingar, eftir atvikum með aðstoð þjónustuaðila á grundvelli vinnslusamnings;
• til Pizzunnar: nafni og netfangi vinningshafa gjafaleiksins, svo hægt sé að afhenda vinninginn;
• til stjórnvalda ef lög krefjast þess.

Leikurinn og gögnin eru hýst á netþjóni KIWI ehf. á Íslandi. Leturgerðir leiksins eru sóttar frá Google Fonts, og við það fær Google IP-tölu tækisins þíns. Um þá vinnslu gildir persónuverndarstefna Google.

5.Hversu lengi upplýsingarnar eru geymdar

• Skráningar á stigatöflunni: á meðan leikurinn er aðgengilegur, og eytt eigi síðar en 12 mánuðum eftir að honum lýkur, eða strax ef þú dregur samþykkið til baka.
• Netföng: þar til þú dregur samþykkið til baka eða biður um að þeim sé eytt.
• Tölfræði: samtölur fyrir hvern dag eru ópersónugreinanlegar. Fingrafari IP-tölu sem notað er við talninguna er eytt eftir tvo daga.
• Skráningar til varnar misnotkun: tímabundnar skráningar eru eyddar sjálfkrafa eftir um sólarhring. Fingrafar IP-tölu sem fylgir skráningu á stigatöflunni er geymt jafnlengi og skráningin.

6.Öryggi

KIWI ehf. beitir viðeigandi tæknilegum og skipulagslegum ráðstöfunum til að vernda upplýsingarnar, þar á meðal dulkóðuðum tengingum, aðgangsstýringu og því að gagnagrunnurinn er ekki aðgengilegur af vefnum. Netföng eru aldrei send út úr leiknum, hvorki á stigatöfluna né til annarra spilara.

7.Réttindi þín

Þú átt rétt á að:

• fá upplýsingar um og aðgang að þeim persónuupplýsingum sem unnið er með um þig;
• fá rangar eða ófullnægjandi upplýsingar leiðréttar;
• fá upplýsingum um þig eytt („rétturinn til að gleymast“);
• fara fram á takmörkun á vinnslu;
• andmæla vinnslu sem byggir á lögmætum hagsmunum;
• fá upplýsingarnar afhentar á tölvutæku formi (flutningsréttur);
• draga samþykki þitt til baka hvenær sem er, sem hefur þó ekki áhrif á lögmæti vinnslu fram að því.

Önnur erindi má senda á sverrir@kiwi.is. Brugðist er við án ótilhlýðilegrar tafar og að jafnaði innan eins mánaðar.

8.Kvörtun

Ef þú telur að vinnsla persónuupplýsinga um þig samrýmist ekki lögum getur þú beint kvörtun til Persónuverndar, Laugavegi 166, 105 Reykjavík, personuvernd.is, postur@personuvernd.is.

9.Breytingar

Þessi texti kann að taka breytingum. Nýjasta útgáfa er ávallt birt á þessari slóð og dagsetning síðustu uppfærslu kemur fram efst á síðunni.

10.Samband

KIWI ehf., kt. 681116-2300, fyrir hönd Pizzan ehf.
Reykjavík, Ísland
sverrir@kiwi.is